У суботу, 12 красавіка, адбылася сустрэча маладзёжнага хору з Уладзімірам Папковічам -- віцебскім паэтам, выкладчыкам нямецкай мовы Віцебскага дзяржаўнага ўніверсітэта імя П. М. Машэрава, даўнім сябрам калектыву. Дзякуючы менавіта гэтаму чалавеку калектыў ужо больш за дваццаць гадоў супрацоўнічае з хорам "Канторай" з Вэцлара (Германія), было арганізавана шмат сумесных выступленняў і ў Беларусі, і ў Германіі. Уладзімір Антонавіч разам з Урсулай Хайніке ўтварылі беларуска-нямецкае таварыства "Willkomen -- Калі ласка" на пачатку 90-х гг. мінулага стагоддзя. Па запрашэнні таварыства з творчым візітам у Германіі пабываў і наш знакаміты зямляк паэт Рыгор Барадулін, які, на жаль, нядаўна пайшоў з жыцця. Успамінам пра народнага паэта Беларусі і была прысвечана гэта сустрэча. Уладзімір Антонавіч расказаў удзельнікам хору пра сваё знаёмства з Рыгорам Іванавічам, некаторыя факты з яго біяграфіі, паказаў некалькі фота з уласнага архіва, а таксама прачытаў некалькі вершаў ("Бацьку", "Трэба дома бываць часцей", "Спаднічкі" і інш.). На сустрэчы прысутнічаў і віцебскі мастак-акварэліст Фелікс Гумэн.
На здымку (злева направа): Аляксандр Раўза, Уладзімір Папковіч, Фелікс Гумэн, Віталь Раўза.
|